Los entamos del proyéutu



Esta hestoria entamó fai tiempu. Hai casi un añu, nún d’esos díes nos que te respiga'l trabayu.

El de mio ye ser profesora de Dibuxu y fáigolo nel institutu públicu de la Pola L.lena. Ellí quedamos ablucaos, el mio collaciu d’Asturianu y yo, al lleer un relatu que presentó Aarón pa un concursu lliterariu col tema de la montaña como exa principal. El xabalí del Picu la Penasca dexónos dos coses bien clares: l’amor d’Aarón pola montaña y la necesidá d'espresalo cenciella y contundentemente na so llingua materna.
Yera una ayalga nestos tiempos escosos, que facía ferver les idegues maxinando la hestoria en semeyes. Nin Xesús (el mio collaciu d’Asturianu) nin yo somos profesionales del mundu audiovisual, asina que los nuestros suaños viéronse torgaos poles dificultaes técniques y el proyéutu foi posando poquinín a pocu nel escaezu.
Del cantu la memoria rescatólo Dani, que vio una bona hestoria pa nun dexar pasar y acompañóme prestando los sos conocimientos téunicos. Asina volvimos a coyer la idea de subir al monte con Aarón pa que nos enseñara esi mundu del que fala tolos díes.
Yéremos solo tres persones mui estremaes pero cola mesma mirada. Xesús punxo la entrevista y l'orden nel guión, Dani puxó pola cámara y llueu pol montaxe, y entovía tuvo  ganes pa facer una musiquina mui prestoso. 
Paézme que la que menos fici fui yo. El mio méritu ye fortuitu, d’un llau trabayar onde trabayo y poder conocer a xentiquina como Aarón, y d’otru, nun tener vergoña pa falar cola madre’l gua.he y echar andar tol tinglao.
Pa mí esta hestoria ye pequena. Ye un homenaxe que-y fago  al mio alumnao por aprendeme día a día a ver el mundu d’una manera distinta, a valorar coses qu’esti mundu actual siempre arrequexa. Coses pequenes que son mui grandes.



Sonia Fernández